Oficina virtualSuper User
A Xunta ofrece a súa colaboración para darlle unha segunda vida a Alu Ibérica na Coruña
- O vicepresidente primeiro e conselleiro de Economía, Industria e Innovación, Francisco Conde, reuniuse con representantes de Resonac e Ignis para afondar no plan industrial que propoñen.
O vicepresidente primeiro e conselleiro de Economía, Industria e Innovación, Francisco Conde, mantivo esta tarde unha reunión con representes de Resonac e Ignis para coñecer o plan industrial que están a propoñer nos terreos de Alu Ibérica na Coruña.
Na xuntanza, o Goberno galego ofreceu a súa colaboración para darlle unha segunda vida a Alu Ibérica na Coruña e unha nova oportunidade ao capital humano que depende destas instalacións. Así, acolle esta iniciativa con optimismo pero tamén con prudencia, pois hai un procedemento por diante e a decisión definitiva está en mans do administrador concursal.
O proxecto suporía adquirir o 100% da superficie dispoñible para, no caso de Resonac, ampliar as instalacións e construír unha nova factoría orientada á produción de grafito para baterías e, no caso de Ignis, construír unha planta de hidróxeno verde.
“Estamos ante unha oferta realista que pode permitir a creación de postos de traballo, crecer desde o punto de vista industrial e un posicionamento enerxético”, dixo Conde. Unha proposta, engadiu, “acorde cos da Xunta de Galicia neste proceso de transformación económica e da transición enerxética. A partir de aí —subliñou— o que esperamos é que esta segunda oportunidade desde o punto de vista industrial tamén poida ser unha segunda oportunidade desde o punto de vista laboral”, concluíu.
Rueda salienta o potencial de Galicia como centro industrial e loxístico do sector emerxente da eólica mariña
- Considera o desenvolvemento da eólica mariña unha “grande oportunidade” que vai xerar riqueza e empregos, polo que insta a “non deixala pasar”.
O presidente da Xunta, Alfonso Rueda, salientou hoxe o “enorme potencial e posibilidades” de Galicia como centro industrial e loxístico para un sector emerxente como o da eólica mariña. Así o enxalzou durante a presentación dun novo proxecto no eido de compoñentes eólicos da empresa Nervión Naval Offshore, unha iniciativa que o mandatario galego considerou exemplo das novas oportunidades de negocio que a eólica mariña traerá a Galicia, xa que creará 400 postos de traballo entre As Somozas e o porto exterior de Ferrol.
Rueda destacou que, no momento actual, se está ante unha nova revolución industrial da man das enerxías renovables. “É unha oportunidade que non hai que deixar pasar”, advertiu, ao tempo que salientou a creación de riqueza e postos de traballo cualificados directos e indirectos vencellados ao seu desenvolvemento.
Por iso, apelou á industria e tamén ás administracións a “ser capaces de subirse a este tren” tanto á hora de xerar esta enerxía renovable, como de aproveitar a oportunidade que estas novas enerxías ofrecen a outros sectores, como a industria de compoñentes.
Rueda remarcou a postura da Xunta de defender un desenvolvemento de eólica mariña garantista coa coexistencia da actividade pesqueira e coa protección do ecosistema. “Imos ser absolutamente exixentes na compatibilidade co resto de actividades”, comprometeuse ao tempo que defendeu, en todo caso, “non pecharse” ante as novas oportunidades que vai supor esta enerxía renovable, entre as que tamén citou a creación de novos empregos que darán pulo á Formación Profesional Dual.
Medidas da Xunta para atraer investimentos
Rueda enmarcou este proxecto de Nervión Naval Offshore dentro das iniciativas potentes que Galicia está a atraer e que atribuíu á estabilidade, certeza e facilidades que impulsa o Goberno galego a través de medidas, como as bonificacións por localizarse en parques empresariais autonómicos ou figuras legais, como a iniciativa empresarial prioritaria, que permiten acurtar prazos.
A Xunta activa o Plan de misións comerciais co que se desenvolverán este ano preto de 100 iniciativas en máis de 30 países para impulsar a internacionalización
- Comeza o prazo para que as cámaras de comercio soliciten a aprobación das accións a realizar dentro deste programa, ao que se destinan 2,3 millóns.
Consulta o calendario de accións
A Xunta ten activo o novo Plan de misións comerciais, a través do cal se destinan 2,3 millóns de euros a accións de internacionalización do tecido produtivo galego na procura de impulsar, durante este ano, preto de 100 misións en máis de 30 países.
Novo curso IGAPE Fórmate Internacional: 12 pasos para unha Internacionalización efectiva
No marco do PROGRAMA FÓRMATE INTERNACIONAL, a Xunta, a través do IGAPE, organiza un novo curso para impulsar a internacionalización das empresas galegas: 12 pasos para unha internacionalización efectiva.
A través de Fórmate Internacional queremos proporcionar coñecemento específico e de calidade en materia de internacionalización empresarial ao sistema produtivo galego.
Tra-lo éxito acadado polos ultimos cursos celebrados, esta nova proposta ten por fin dar a coñecer as bases e áreas fundamentais que todo profesional do comercio exterior debería coñecer.
Unha estratexia de competitividade internacional pasa pola formación do capital humano da empresa.
O novo curso, titulado 12 PASOS PARA UNHA INTERNACIONALIZACIÓN EFECTIVA, é unha formación organizada en 12 sesións de 90 minutos de duración realizadas con frecuencia semanal. Tocará todos os campos principais do comercio internacional, ofrecendo unha guía básica para a internacionalización efectiva da empresa.
A inscrición é de balde.
Conde pon Fenestra como exemplo de PEME que inviste en equipamento e enerxías renovables para adaptarse ao contexto actual
- Conde di que esta empresa, beneficiaria do programa Galicia Inviste, contribúe a que Monforte e toda a súa comarca fale máis en clave industrial.
- Galicia Inviste leva apoiado a mobilización de 130 millóns de euros a través de 360 axudas concedidas -o 10 por cento corresponden á provincia de Lugo- desde a súa posta en marcha en 2018.
- Adianta que a Xunta de Galicia xa está avanzando na tramitación das autorizacións e informes que van permitir que nas vindeiras semanas o proxecto do Grupo Indukern na comarca, cun investimento de máis de 30 millóns de euros, sexa unha realidade e poida comezar as obras de construción.
O vicepresidente primeiro e conselleiro de Economía, Industria e Innovación, Francisco Conde, puxo hoxe a empresa luguesa Fenestra como exemplo de peme que inviste en equipamento e enerxías renovables para adaptarse ao contexto actual e gañar en competitividade.
Nunha visita ás instalacións da firma asentada en Monforte de Lemos e especializada na fabricación de fiestras de pvc, Conde destacou o esforzo que Fenestra está a facer para optimizar os seus procesos de produción e para ser máis eficiente e reducir o custo enerxético. Un obxectivo común ao tecido empresarial galego que a Xunta de Galicia está apoiando a través do programa Galicia Inviste.
Segundo explicou, mediante esta orde apoios do Igape, a Administración autonómica pon á disposición das pemes galegas financiamento para proxectos de diversificación, mellora de procesos e produtos, maquinaria e equipamento, e tamén para o sector do aloxamento. Ademais, por primeira vez desde o ano pasado, pódense solicitar conxuntamente axudas e préstamos.
Desde que en 2018 se puxo marcha o programa Galicia Inviste, a través do Igape, leva mobilizado nestes catro anos 130 millóns de euros en 360 proxectos cun investimento público de 33 millóns de euros. Concretamente, na provincia de Lugo, a partir dun orzamento de 2,8 millóns de euros, mobilizáronse 10,8 millóns de euros para 37 iniciativas.
Fenestra é unha das empresas que se viu beneficiada por estas axudas, cunha mobilización de investimentos por máis de 260.000 euros para implantar unha soldadura de pvc que mellora a calidade e o acabado do produto. Ademais, no seu compromiso pola eficiencia enerxética, tamén instalou placas fotovoltaicas cunha axuda da Xunta de Galicia, a través do Inega, de case 8000 euros para un mobilizado de 20.000 euros.
Conde referiuse a Fenestra como “un exemplo claro de competitividade que está afrontado os retos actuais, xerando emprego e crecendo no rural, e permitindo que Monforte e toda a súa comarca fale máis en clave industrial”. Ao respecto, concluíu avanzando que a Xunta de Galicia xa está avanzando na tramitación das autorizacións e informes que van permitir que nas vindeiras semanas o proxecto do Grupo Indukern na comarca, cun investimento de máis de 30 millóns de euros, sexa unha realidade e poida comezar as obras de construción.
A Xunta impulsa este ano preto de 100 misións comerciais de empresas galegas en máis de 30 países
- A acción enmárcase na Estratexia de Internacionalización do Goberno galego, que está a contribuír a que Galicia veña de lograr un novo récord histórico en vendas ao exterior: case 30.000 millóns ao peche de 2022, un 18,3% máis que en 2021.
Consulta o calendario de accións
O director do Instituto Galego de Promoción Económica (Igape), Fernando Guldrís, acompañado dos representantes das cámaras de comercio de Pontevedra, Vigo e Vilagarcía, da Coruña e de Santiago, presentou hoxe a nova convocatoria do Plan de Misións Comerciais, que destina 2,3 millóns de euros a accións de internacionalización do tecido produtivo galego na procura de impulsar, durante este ano, preto de 100 misións en máis de 30 países.
O programa, que desenvolve a Vicepresidencia primeira e Consellería de Economía, Industria e Innovación, a través do Igape e en colaboración coas cámaras galegas, contempla dúas liñas, unha centrada nas pequenas e medianas empresas e que suma máis do 80% do orzamento, e outra habilitada para as grandes empresas, na procura de que estas acheguen ás misións a súa experiencia e volume como efecto tractor.
Neste sentido, detallou Guldrís, aspírase a chegar a 500 participacións de pemes -cada empresa participa en máis dunha actuación- nas accións de promoción, favorecendo a súa imaxe nos mercados exteriores. “Este ano, por citar algúns exemplos, temos, entre outras, a participación do sector agro alimentario na Feira Fancy Food nos Estados Unidos; a visita do sector naval á feira Norhsipping en Noruega; a asistencia do sector da Biotecnoloxia á Bio International Convention en Estados Unidos e á Expo BioJapan 2023, ou a participación do sector da pedra natural na Feira Marmomac en Italia”, afondou.
O director do Igape salientou que todas as actuacións están dirixidas a aumentar a base de empresas exportadoras, a fomentar e consolidar a presenza de empresas galegas nos mercados internacionais, e a conseguir unha maior diversificación, tanto sectorial como xeográfica das exportacións galegas.
O programa prevé para esta convocatoria máis de 30 mercados prioritarios de acción comercial entre os que se sitúan China, India, Israel, Xapón, Reino Unido, Alemaña, Marrocos, Brasil, México, Emiratos Árabes, Estados Unidos ou Canadá, así como outros países para os que se xustifique a idoneidade do mercado para as empresas galegas.
As actuacións, consistentes en misións empresariais directas ao estranxeiro ou na participación en feiras e outros eventos expositivos, contan con apoios que alcanzan o 90% no caso das pequenas e medianas empresas, porcentaxe que pode acadar ata o 70% para as grandes empresas.
“Desde o ano 2014 levamos destinado máis de 12 millóns á organización destas misións internacionais, cunha participación media anual de máis de 170 pemes, o que ten permitido impulsar actuacións en 70 países diferentes”, destacou Guldrís.
Récord histórico de exportacións
O director do Igape detallou que Plan de Misións comerciais enmárcase na Estratexia de Internacionalización do Goberno galego, que está a contribuír a que Galicia veña de lograr o seu récord histórico en exportacións: case 30.000 millóns ao peche de 2022, en concreto 29.886 millóns, o que supón un 18,3% máis que no anterior exercicio.
Unha cifra, lembrou, que permite a Galicia contar cun saldo favorable de 2.800 millóns de euros entre as exportacións e as importacións contabilizadas ao longo do último ano, mentres que en España o saldo segue a ser deficitario.
“E todo isto sen esquecer a resiliencia das empresas exportadoras galegas: en 2022, un total de 8.496 compañías realizaron vendas no exterior; e o que é máis importante, as empresas galegas exportadoras regulares -aquelas que exportaron nos últimos 4 anos-, acadaron as 2.653, récord histórico tamén que supón un incremento anual do 3,5%”, concluíu Guldrís.
A Xunta advirte da necesidade de financiamento europeo para que a automoción poida seguir medrando canda Galicia
- O vicepresidente primeiro e conselleiro de Economía, Industria e Innovación, Francisco Conde, participou na inauguración do XXXII Salón do automóbil e a motocicleta de Vigo.
- Desde a Administración autonómica espérase que a nova convocatoria do Perte do vehículo eléctrico e conectado traia as respostas que precisa a industria galega.
O vicepresidente primeiro e conselleiro de Economía, Industria e Innovación, Francisco Conde, sinalou esta tarde na inauguración do XXXII Salón do automóbil e a motocicleta de Vigo que Stellantis está chamada a seguir medrando con Galicia, e que para iso precisa respostas para os seus plans de futuro. Gran parte delas, segundo subliñou, dependen do compromiso de fondos europeos, que a día de hoxe seguen a depender da vontade política do Goberno de España.
O salón do automóbil de Vigo reúne este ano a 35 marcas de vehículos e 25 de motos, que farán desta cita un dos eventos fundamentais do sector da distribución de vehículos en Galicia. Os automóbiles electrificados son os grandes protagonistas da edición, na que os organizadores estiman que recibirán arredor de 48.000 visitantes.
Conde, que lembrou que preto do 14 % do emprego industrial galego traballa no sector e que este supón máis do 32 % das exportacións galegas, apuntou que desde a Administración autonómica se espera que a nova convocatoria do Perte do vehículo eléctrico e conectado traia consigo as respostas que precisa a industria galega. Do mesmo xeito, incidiu en que as comunidades autónomas deben poder acceder en igualdade de condicións aos fondos europeos.
O responsable de Economía, Industria e Innovación subliñou que Galicia está a cumprir a súa parte, e así, desde 2009 a Xunta destinou máis de 210 millóns de euros para apoiar a evolución do sector.
Rueda salienta a capacidade de Galicia para captar investimentos, grazas á estabilidade institucional, á boa marcha da economía e á posición xeográfica estratéxica
- O presidente da Xunta presentou en Madrid a sociedade público-privada Impulsa Galicia.
O presidente da Xunta, Alfonso Rueda, salientou que a estabilidade institucional, a boa marcha da economía e a posición xeográfica estratéxica son os piares que fan de Galicia unha terra atractiva para o investimento. “Por Galicia paga a pena apostar”, proclamou o xefe do Executivo autonómico. Fíxoo durante a presentación da sociedade público-privada Impulsa Galicia en Madrid, encargada de identificar as oportunidades do escenario económico actual e poñelas ao servizo do progreso da nosa comunidade.
Ofrecer certezas respecto dos fondos europeos
Alfonso Rueda insistiu en que estes proxectos transformadores corren risco de non chegar a bo porto se o Goberno central non axiliza as axudas europeas que precisan facendo xa un reparto xusto, proporcionado e transparente dos Next Generation. Recordou, que no que respecta aos fondos que xestiona o Goberno galego, practicamente están mobilizados ao cen por cen, pero non así os que corresponden aos Perte. Dos 41.000 millóns asignados, hai máis de 28.600 que aínda non se convocaron e outros 7.000 que aínda non teñen un destinatario asignado. Polo tanto, apenas un de cada dez euros destas axudas chegaron ao tecido produtivo.
O presidente da Xunta asegurou que a Comunidade galega conta con todos os ingredientes para liderar ese cambio económico e social, gracias á seguridade xurídica, as figuras para axilizar e facilitar a implantación de novas empresas e á creación de emprego e de riqueza. Galicia ten xa máis postos de traballo a tempo completo que antes da pandemia, bateu o récord histórico de exportacións con 30.000 millóns de euros e está apostando polo seu capital humano, moi especialmente a través da Formación Profesional.
Fixo mención específica ao gran potencial enerxético de Galicia e exemplificouno coas plantas de hidróxeno verde que se están a proxectar para as zonas de transición de As Pontes e Meirama, a interconexión coa rede de gasodutos que acadou un fito a pasada semana coa alianza entre Reganosa e Enagás e a aposta por un desenvolvemento racional da enerxía eólica.
A carón das iniciativas emprendedoras
O mandatario galego confrontou o modelo da Xunta co de outras Administracións que cuestionan ao empresariado. Fronte a esa política, Alfonso Rueda quixo dar a benvida a todas as iniciativas emprendedoras que aposten por Galicia para implantarse no seu territorio e medrar da man da súa sociedade, xa que advertiu que un país non prospera sen empresarios. Neste senso, salientou as políticas ambiciosas da Xunta de solo empresarial e de darlle prioridade aos proxectos estratéxico, ademais de reivindicar infraestruturas claves para o progreso económico como o Corredor Atlántico Noroeste.
Rueda concluíu poñendo en valor as liñas de traballo do Goberno galego na aposta polo i+D+i, na captación de inversións produtivas e -a través da sociedade Impulsa- no pulo a proxectos con vocación transformadora co obxecto de situar no centro do mundo conectado a Galicia, da que defendeu as súas incalculables oportunidades.
A Xunta espera que o novo Perte do vehículo eléctrico ofreza certezas a un sector que supón preto do 14 % do emprego industrial de Galicia
- O director do Igape, Fernando Guldrís, participa na reunión da Alianza do Perte Vehículo Eléctrico e Conectado (VEC), convocada polo Ministerio de Industria, onde salienta a necesidade de que os principais fabricantes de España, incluíndo Stellantis, atopen nas futuras convocatorias unha resposta aos seus plans de futuro.
- Lembra que na primeira convocatoria do Perte VEC quedaron sen adxudicar ao redor de 2.200 millóns de euros, e que, en paralelo, de modo unilateral, se asignaron fondos para proxectos na Comunidade Valenciana e en Cataluña para financiar actuacións neste eido.
- Defende que se ofrezan respostas a outros proxectos relacionados coa automoción, como é o caso de Resonac, que proxecta unha planta para a fabricación de grafito destinada a baterías eléctricas.
O director do Igape, Fernando Guldrís, participou hoxe na reunión da Alianza do Perte Vehículo Eléctrico e Conectado (VEC), convocada por vía telemática polo Ministerio de Industria, Comercio e Turismo, un encontro no que salientou a importancia de que o novo Perte “ofreza certezas” a un sector que, en Galicia, supón preto do 14 % do emprego industrial.
Neste sentido, Guldrís sinalou que, de cara a futuras convocatorias, os principais fabricantes de España, incluíndo Stellantis, deben atopar unha resposta aos seus plans de futuro. “Está en xogo a competitividade da planta de Stellantis en Vigo, e abaratar os custos de fabricación de vehículos. É un compromiso vital para a automoción galega, ao igual que a necesidade de comprometer os apoios precisos para que Stellantis Vigo poida contar coa nova plataforma para a fabricación dos futuros modelos eléctricos”, afondou.
Sobre esta base, o director do Igape lembrou que na última convocatoria se deixaron sen adxudicar ao redor de 2.200 millóns de euros no Perte VEC. Así mesmo, en paralelo e de modo unilateral, asignáronse 90 millóns de euros para a Comunidade Valenciana como apoio para o desenvolvemento dunha fábrica de baterías, e preto de 30 millóns de euros a Cataluña para financiar actuacións que faciliten o desenvolvemento do ecosistema eléctrico e conectado.
Guldrís aproveitou o encontro tamén para defender que se ofrezan respostas a outros proxectos relacionados coa automoción, como é o caso de Resonac, que podería impulsar unha planta para a fabricación de grafito destinada a baterías eléctricas.
“As comunidades autónomas debemos poder optar aos fondos en igualdade de condicións”, afondou o director do Igape, quen, de cara á próxima convocatoria do Perte do Vehículo Eléctrico, defendeu a importancia dun reparto “descentralizado e áxil dos fondos” que permita “recoñecer na súa xusta medida todo o esforzo que Galicia e o seu sector da automoción veñen facendo desde hai moito tempo para consolidarse como un referente nacional e internacional”.
A Xunta incide en que Galicia ten a oportunidade de despregar a eólica mariña desde o diálogo e a compatibilidade coa actividade pesqueira
- O vicepresidente primeiro e conselleiro de Economía, Industria e Innovación, Francisco Conde, clausurou hoxe en Ferrol o encontro Galician Offshore Internacional Hub, onde subliñou que a Comunidade pode posicionarse como un referente non só a nivel tecnolóxico e industrial, senón tamén en termos de xeración.
- Pon en valor a colaboración de máis de sete anos que ten Iberdrola con Navantia e Windar; os plans de expansión de Nervión Naval Offshore ou as futuras instalacións de Cobra e Saitec no porto exterior da Coruña.
O vicepresidente primeiro e conselleiro de Economía, Industria e Innovación, Francisco Conde, incidiu hoxe en Ferrol, na clausura do encontro Galician Offshore International Hub (GOInterHUB) en que Galicia ten a oportunidade de despregar as enerxías renovables, e a eólica mariña en particular, desde o diálogo e a compatibilidade coa actividade pesqueira.
O vicepresidente primeiro apuntou que Galicia pode posicionarse neste contexto como un referente non só a nivel de desenvolvemento tecnolóxico e industrial, senón tamén en termos de xeración. Conde fixo fincapé en que ese obxectivo non pode darse a calquera prezo, xa que por enriba de todo está a preservación dos ecosistemas mariños e a defensa do sector da pesca.
Na súa intervención, o vicepresidente primeiro reivindicou a experiencia de Galicia no eido industrial, poñendo como exemplo a colaboración de máis de sete anos que ten Iberdrola con Navantia e Windar, que suma contratos de eólica mariña por valor de preto de 1.300 millóns de euros; os plans de expansión de Nervión Naval Offshore no porto exterior de Ferrol e agora tamén na antiga planta de Siemens Gamesa; ou as futuras instalacións de Cobra e Saitec no porto exterior da Coruña.
Tal e como lembrou o responsable de Economía, Industria e Innovación, Galicia creou o Observatorio de eólica mariña como punto de encontro de todos os axentes implicados para identificar oportunidades e acordar os pasos a dar. Tamén se buscou sinerxías con outras comunidades, a través do Clúster da eólica offshore, xunto con Cantabria e Asturias, para desenvolver unha estratexia compartida que posicione o norte de España como un referente internacional neste eido.
Conde apelou ao diálogo e a que o Executivo central conte coas Comunidades Autónomas, sinalando que aínda está pendente a aprobación da normativa que regule o desenvolvemento dos parques de eólica mariña, así como as poxas para adxudicar a lámina de auga. Neste sentido, Galicia xa propuxo que, para evitar afeccións ao territorio, se adopte un modelo centralizado no que os promotores compartan as infraestruturas de evacuación.
