• Rueda salienta que o obxectivo é que as empresas galegas sigan batendo récords de exportacións e abríndose “a novos mercados”
• Asegura que as achegas buscan promover actividades “de difusión no exterior” como campañas publicitarias e asistencia a feiras coma apoiar “accións para aumentar as exportacións”
• Explica que o Goberno galego lanza unha nova convocatoria dos programas Galicia Exporta Empresas e Organismos Intermedios para mellorar o posicionamento das empresas galegas no mercado internacional
• Estes apoios súmanse ao programa Galicia exporta dixital, que permite ás pemes avanzar nos seus procesos de internacionalización a través de ferramentas innovadoras
• O presidente resalta que desde a posta en marcha do Galicia Exporta Empresas, no ano 2016, téñense apoiado “preto de 1.500 plans de promoción internacional”, cunha axuda total ata a data de 30,5 M€
• Hai que sumar outros 8,7 M€ e 165 iniciativas promovidas a través do Galicia Exporta Organismos Intermedios

O presidente da Xunta, Alfonso Rueda, informou hoxe dunha nova convocatoria de dúas liñas de axudas -Galicia Expora Empresas e Galicia Exporta Organismos Intermedios- para promover a internacionalización de pemes e autónomos galegos. “Serán 3 millóns de euros para costear accións realizadas ao longo deste ano 2023”, explicou.

Rueda resaltou que estas achegas van dirixidas tanto a empresas como a clústeres, asociacións empresariais ou consellos reguladores. O presidente indicou que o obxectivo é que as empresas galegas sigan exportando e “abríndose a novos mercados”. Nesta liña, destacou que nos primeiros sete meses de 2023 bateuse un novo récord de exportacións ao chegar “a cifra histórica de 17.374 M€”.

Para iso as axudas buscan impulsar actividades “de difusión no exterior” coma campaña publicitarias e a participación en feiras internacionais así como a accións específicas “para aumentar as exportacións e adaptar os produtos as demandas dos países” onde se van vender.

As axudas, que se poderán solicitar durante un mes desde o día seguinte á publicación no Diario Oficial de Galicia, cobren as actuacións que se celebren desde o 1 de xaneiro de 2023 e ata o 15 de decembro de 2023. O apoio máximo por solicitude e beneficiario chega, no caso do Galicia Exporta Empresas, ata os 95.000 euros e no de Organismos Intermedios, aos 400.000.

O obxectivo destas liñas, impulsadas pola Consellería de Economía, Industria e Innovación, a través do Igape e no marco da Estratexia de Internacionalización, é apoiar a saída ao exterior do tecido empresarial galego, especialmente de pemes e establecementos comerciais, a través de novas canles de comercialización.

Un marco no cal tamén se activará proximamente unha nova convocatoria do Galicia exporta dixital, pois o desenvolvemento das tecnoloxías dixitais supón un enorme potencial para a mellora da competitividade nos mercados internacionais no actual contexto económico. O obxectivo é permitir ás empresas apoiarse en ferramentas innovadoras para acceder aos mercados exteriores.

Neste sentido, tal e como destacou o presidente desde a posta en marcha do Galicia exporta empresas, no ano 2016, “téñense apoiado preto de 1.500 plans de promoción internacional”, con accións de difusión, e asistencia a feiras ou prospección de novos mercados, cunha media de participación de máis de 240 empresas ao ano, o que supuxo unha axuda total ata a data de 30,5 M€.

Cifras ás que se suman os máis de 8,7 M€ e 165 iniciativas promovidas a través do Galicia exporta organismos intermedios. Pola súa banda, o Galicia exporta dixital ten beneficiado xa a máis de 400 empresas por importe de máis de 14 M€ e un investimento inducido de 17,6 M€.

Incremento das exportacións

Todas estas accións englóbanse na Estratexia de internacionalización que está a promover o goberno galego e que ten como principais claves a aposta pola dixitalización e a diversificación dos mercados exportadores.

Grazas a este esforzo conxunto, Galicia segue a bater os seus rexistros de exportacións. Así, a Comunidade sumou nos sete primeiros meses de 2023 vendas ao exterior por valor de 17.374 M€, o que supón un récord histórico, e un 2,5 % máis o período homólogo de 2022.

A balanza comercial galega presenta un saldo positivo de 5.332,1 M€ (773 millóns en xullo), cifra que duplica a obtida o primeiro semestre de 2022 e contrasta co saldo comercial de España, o cal segue lanzando un resultado negativo.

Santiago de Compostela, 16 de outubro de 2023 A directora do Igape, Covadonga Toca, mantivo un encontro de traballo co equipo directivo de Viratec -Clúster Galego de Solucións Ambientais e Economía Circular-. No encontro subliñouse a importancia da colaboración público-privada para contribuír ao desenvolvemento sustentable da sociedade galega e a preservación do seu medio ambiente, baixo os principios da economía circular. Esta cooperación coa Administración e entre empresas xera sinerxías entre distintas áreas de coñecemento, promove a I+D+i, mellora a formación e crea oportunidades de internacionalización.

• O novo programa busca facilitar ás pequenas e medianas empresas o acceso a dotacións dixitais e servizos avanzados a prezos competitivos e con prazos axustados ás súas necesidades
• As axudas financian a posta en marcha de proxectos de creación destes centros dixitais, con apoios que poden chegar ata o 80 % do investimento subvencionable, estando previstos tamén anticipos de ata o 80 %
• As infraestruturas poderán ser para uso exclusivo da empresa promotora do proxecto ou ben para o seu uso aberto e compartido, contribuíndo a reforzar o contorno de empresas e consumidores, e a dixitalización e modernización do tecido produtivo
• O prazo de presentación de solicitudes permanecerá aberto ata o 11 de decembro

Santiago de Compostela, 14 de outubro de 2023

O novo programa de Centros Dixitais promovido pola Consellería de Economía, Industria e Innovación a través do Igape suma preto de 6,5M € para mellorar a dixitalización do tecido empresarial e modernizar a industria galega a través de novos proxectos de creación deste tipo de infraestruturas na provincia da Coruña. O obxectivo é contribuír, tanto a nivel empresarial como local, a mellorar a dixitalización dos procesos empresariais, a contorna das empresas e os consumidores, e a modernizar e desenvolver a base industrial.

Cómpre salientar que a dispoñibilidade local destas infraestruturas dixitais de apoio e reforzo á industria beneficia de xeito especial ás pemes, ao permitirlles acceder a dotacións dixitais e servizos avanzados a prezos competitivos e con prazos axustados ás súas necesidades.

Neste marco, os centros dixitais, que poderán ser para uso exclusivo da empresa promotora do proxecto ou ben para o seu uso aberto e compartido, fomentarán o desenvolvemento de sistemas e conectividade dixital, a monitorización ou xestión remota de activos ou instalacións, e o control e comando de operacións en calquera ámbito de actividade, especialmente para instalacións de produción ou de xeración de enerxías renovables e no ámbito da mobilidade.

Así, o programa permitirá impulsar, entre outros, sistemas de simulación e sistemas de control de activos conectados, frotas de vehículos, captación e almacenamento de datos; sistemas de telemetría e telecomando tamén aplicables a vehículos e frotas, así como a instalacións enerxéticas, zonas de seguridade e espazos loxísticos.

O prazo de presentación de solicitudes estará aberto ata o vindeiro 11 de decembro.
O investimento subvencionable oscilará entre os 100.000 euros e os 3 M€, podendo acadar o importe da axuda ata o 80 % en función da tipoloxía do proxecto. Así mesmo, está prevista a posibilidade de realizar pagamentos anticipados de ata o 80 % do importe da axuda.

A través dos Centros Dixitais o Goberno galego reforza a súa aposta por un modelo de crecemento intelixente, sostible e innovador, contribuíndo á modernización e desenvolvemento da base industrial da zona na que se instalen. Cómpre salientar que a liña se enmarca no programa de Fondos de Transición Xusta, que buscan xerar un impacto económico e social positivo e contribuír á consolidación das pequenas e medianas empresas nos lugares definidos para estas zonas, que se localizan na provincia da Coruña.

O programa dá continuidade a outro tipo de iniciativas deste estilo, como os Centros de Fabricación Avanzada, que veñen de lanzar unha segunda convocatoria logo de pecharse a primeira coa creación de seis centros que suman máis de 16 M€ en apoios e que están a permitir promover proxectos en sectores industriais diversos, como as TIC, o biotecnolóxico, o turismo ou o agroalimentario.

• A directora do Igape, Covadonga Toca, participa na inauguración do encontro El mundo que viene, organizado por APD, no que salienta a importancia da cooperación público-privada para impulsar un “modelo máis sustentable”
• Defende que o talento resulta fundamental para impulsar a innovación, a competitividade e o progreso do tecido produtivo, e vólvese “esencial” na medida na que a automatización e a intelixencia artificial continúan transformando a economía
• Lembra que esta aposta se materializa, tamén, na conquista de novos mercados, contribuíndo a que Galicia estea a acadar “o mellor ciclo exportador da súa historia”

Santiago de Compostela, 10 de outubro de 2023

A directora do Igape, Covadonga Toca, participou hoxe na inauguración do encontro anual organizado por APD El mundo que viene. Un evento que afondou no actual escenario xeopolítico, económico e social ao tempo que permitiu avanzar algunha das claves da intelixencia artificial. Un marco no que Toca resaltou a aposta polo talento e a innovación como chaves para seguir construíndo a Galicia do futuro.

Neste sentido, a directora do Igape salientou a importancia do traballo diario e da cooperación público-privada para seguir camiñando cara un “modelo más sustentable”, capaz de impulsar o binomio industria – sustentabilidade, de apostar pola innovación, de manter o mellor ciclo exportador da historia de Galicia, e de ofrecer desde a administración todos os incentivos e medidas de acompañamiento necesarias.

“A medida que a automatización e a intelixencia artificial continúan transformando a economía, o talento humano vólvese aínda máis esencial para desenvolver, implementar e xestionar estas tecnoloxías de maneira ética e efectiva. O talento humano desempeñará un papel fundamental no mundo que vén, xa que será necesario para impulsar a innovación, a competitividade, a adaptabilidade e o progreso”, defendeu Covadonga Toca.

A directora do Igape puxo en valor, neste marco, o traballo que está a facer Galicia, impulsando, a través dos Fondos Next Generation, unha axenda de proxectos industriais en distintos campos. Así, afondou, no eido da Intelixencia Artificial estase a traballar na posta en macha na Coruña da sede da Axencia Española de Supervisión da Intelixencia Artificial, algo que multiplicaría as posibilidades que xa confire o feito de contar cun dos ordenadores cuánticos más avanzados de Europa no Centro de Supercomputación.

Así mesmo, e no eido da mobilidade, Covadonga Toca fixo referencia a iniciativas como a de Resonac para implantar unha fábrica de ánodos para baterías a partir de grafito; no campo do hidróxeno verde resaltou proxectos como as factorías de hidróxeno verde nas Pontes —de Reganosa e EDP Renovables— e en Meirama (Cerceda) —promovida por Reganosa, Naturgy e Repsol—; e no sector biotecnolóxico, o proxecto Sionlla Biotech, en cuxo centro de servicios xa están a traballar as primeiras empresas interesadas.

“Este modelo non só busca posicionar Galicia como un referente dese mundo que vén, senón que contribúe, tamén, a manter o mellor ciclo exportador da nosa historia”, proseguiu a directora do Igape, quen lembrou que o 2022 pechou cos mellores datos de exportación desde que hai rexistros con preto de 30.000 millóns en vendas ao exterior.

Un ciclo, expuso, onde a diversificación é xa “unha parte fundamental”, cunha presenza cada vez máis importante das empresas galegas en mercados como EEUU (+21,2%), México (+48,4%) ou Oriente Medio (+52,5%).

• As persoas consumidoras terán á súa disposición un desconto de 30 euros para as compras nos establecementos adheridos, que suman xa máis de 4.000
• A Consellería de Economía, Industria e Innovación destina 2,5 millóns á segunda convocatoria do ano deste programa co que se incentiva a demanda e se atrae nova clientela aos establecementos locais

• A directora do Igape, Covadonga Toca, participou esta mañá no encontro loxístico Conectividade de contedor marítimo en Galicia, celebrado no marco da Feira Internacional de Produtos do Mar Conxelados
• Subliña o papel da colaboración público-privada para potenciar o crecemento dos sectores produtivos, unha cooperación que, no caso da industria loxística, se materializa nun acordo co Clúster que está a permitir apostar pola innovación e potenciar a internacionalización
• Explica que accións como a ruta marítima co Porto de Miami na que se está a traballar, ou a participación en eventos como a Feria Transport Logistic de Múnic permiten reforzar e poñer en valor as posibilidades e o papel de Galicia como nodo loxístico internacional

Vigo, 5 de outubro de 2023

A directora do Igape, Covadonga Toca, participou esta mañá no encontro loxístico Conectividade de contedor marítimo en Galicia que, celebrado no marco da Feira Internacional de Produtos do Mar Conxelados – Conxemar, permitiu avaliar e coñecer a situación e as posibilidades deste sector no actual contexto económico. Neste sentido, e como destacou Toca, a loxística configúrase como unha industria clave de cara a mellorar a conectividade e potenciar a internacionalización do tecido produtivo galego.

“Unha das aprendizaxes extraídas da pandemia foi, sen dúbida, tomar consciencia da importancia da loxística e o transporte no noso día a día. Os sectores produtivos medran en Galicia grazas á loxística, e a loxística medra grazas aos sectores produtores”, apuntou a directora do Igape, quen puxo en valor o papel da colaboración público-privada neste contexto, destacando o traballo conxunto que está a realizar o Goberno galego xunto ao Clúster da Función Loxística de Galicia.

Esta cooperación, afondou Covadonga Toca, plásmase nun acordo de colaboración que se estende ata o 2024, e que permite analizar datos de conectividade internacional, buscar solucións para as necesidades do sector en cuestións de actualidade como a distribución urbana de mercadorías e as infraestruturas do transporte, apostar pola innovación en iniciativas como o proxecto europeo Cologistics -que impulsa a colaboración transfronteiriza no ámbito do transporte e a loxística da Eurorrexión Galicia-Norte de Portugal-, ou potenciar a internacionalización da loxística de Galicia. 

Neste escenario, a directora do Igape salientou algunha das accións máis importantes que se están a levar a cabo de cara a potenciar Galicia como nodo loxístico internacional, como os avances na ruta comercial directa co Porto de Miami, que busca impulsar tanto a loxística de frío e a sustentabilidade dos portos da Comunidade como a situación de Florida como hub loxístico; ou a participación na Feria Transport Logistic celebrada en Múnic, que contribuíu á posta en valor do potencial de Galicia como nodo loxístico internacional.

“A Xunta ten claro que a loxística constitúe a base para a apertura comercial, a competitividade e a globalización económica, converténdose en peza fundamental para o crecemento económico”, apuntou a directora do Igape, que explicou tamén que, sen un bo servizo loxístico, “hoxe non poderiamos falar de que durante o último ano Galicia superou o récord histórico de exportacións, rozando a barreira dos 30.000 millóns de euros”.

• A conselleira de Economía, Industria e Innovación, María Jesús Lorenzana, asistiu hoxe á inauguración en Oleiros da XIII Semana Internacional Contract Galicia
• Subliña a transversalidade, espírito asociativo e internacionalización deste ‘sector de sectores’

Oleiros (A Coruña), 4 de outubro de 2023

A conselleira de Economía, Industria e Innovación, María Jesús Lorenzana, destacou esta mañá en Oleiros o alto nivel de calidade, diferenciación e competitividade do contract galego, algo que, en gran medida, se debe á aposta pola innovación e o avance no uso de materiais máis sustentables. Lorenzana participou esta mañá na inauguración da XIII Semana Internacional Contract Galicia.

Na súa intervención, a conselleira definiu o contract como “sector de sectores” e subliñou tanto a súa transversalidade como o espírito asociativo e de cooperación que o define, agrupando tanto a empresas como organismos e entidades que permiten abordar proxectos conxuntos con maior proxección internacional.

Precisamente, Lorenzana explicou que máis dun centenar de empresas galegas forman parte deste sector e están presentes en 100 países, con máis de 1.000 proxectos realizados en 600 cidades de todo o mundo.

O acto celebrouse na Boutique Hotel Noa de Oleiros, un espazo que para a conselleira é un bo exemplo das cualidades do contract galego e que amosa as últimas tendencias do sector en sustentabilidade, eficiencia enerxética, ecodeseño, ecoinnovación ou novos materiais.

Lorenzana finalizou coa confianza en que este foro anual permita entablar futuros proxectos de negocio para que o contract galego poida continuar coa súa expansión no mercado internacional.

• O Diario Oficial de Galicia publica hoxe a convocatoria dunha liña que suma preto de 15M€ e que inclúe axudas ao investimento e préstamos parcialmente reembolsables para o financiamento de proxectos
• O prazo de presentación de solicitudes comezará o 2 de outubro, estendéndose ata o vindeiro 31 de outubro, ou ata o esgotamento do crédito
• Os apoios cobren proxectos desde 25.000 ata 900.000€, chegando ao 35% dos investimentos no caso das pequenas empresas, e ao 25% para as medianas
• Desde o ano 2018, este programa permitiu apoiar máis de 360 proxectos mobilizando investimentos por valor de máis de 125 M€

Santiago de Compostela, 29 de setembro de 2023.- O Diario Oficial de Galicia publica hoxe unha nova convocatoria do programa Galicia Inviste, que impulsará a competitividade de preto de un centenar de pemes a través de axudas ao investimento. En concreto, o orzamento ascende aos 15 millóns de euros, cos que se prevé mobilizar máis de 30 millóns de euros.

Un ano máis, a liña inclúe axudas e préstamos parcialmente reembolsables para o financiamento de proxectos de investimento empresarial, coa finalidade principal de dinamizar a actividade económica en Galicia e potenciar a innovación a través do desenvolvemento e mellora das empresas existentes.

O prazo de presentación de solicitudes comezará o 2 de outubro, estendéndose ata o vindeiro 31 de outubro, ou ata o esgotamento do crédito. Ao igual que na anterior convocatoria, ofrécese a posibilidade de solicitar conxuntamente axudas e préstamos para o financiamento de proxectos, na procura de impulsar o mantemento e creación de emprego a través destas novas iniciativas empresarias.

Os apoios cobren proxectos desde 25.000 ata 900.000€, chegando ao 35% dos investimentos no caso das pequenas empresas, e ao 25% para as medianas. Cando as solicitudes de axuda teñan un investimento subvencionable superior a 500.000€, poderán pedir un préstamo parcialmente reembolsable para o seu financiamento, correspondéndose o tramo non reembolsable coa subvención concedida.

O programa establece dúas liñas de actuación: unha centrada nos proxectos de investimento empresarial, e outra que pon o foco en inversións en equipamento produtivo. Así, a primeira busca facilitar a creación de novos establecementos, a ampliación da capacidade dos existentes, a diversificación da súa produción e os cambios nos procesos globais da propia produción. A segunda impulsa a ampliación de capacidade dun establecemento existente. 

Deste xeito, a Xunta pretende dar resposta coordinada ás necesidades financeiras das pemes, facilitando á vez axudas e préstamos parcialmente reembolsables para o financiamento de proxectos de investimento empresarial.

Balance do Galicia Inviste

Ao abeiro deste programa, desde o ano 2018, apoiáronse máis de 360 proxectos mobilizando investimentos por valor de máis de 125 M€.

Estes datos reflicten o compromiso da Xunta de Galicia co tecido empresarial, en particular coas pequenas e medianas empresas e cos autónomos, na procura de facilitar o aceso a axudas e financiamento que precisan para realizar os seus investimentos e potenciar así o xeración de emprego, a innovación e a creación e posta en marcha de proxectos empresariais.

• O Diario Oficial de Galicia publica a convocatoria dunha liña que financia a posta en marcha de proxectos de infraestruturas de uso aberto e compartido, con apoios que chegan ata o 80% do investimento subvencionable
• O obxectivo é facilitar a dispoñibilidade local de infraestruturas de apoio á industria, o que beneficia de xeito especial ás pemes ao permitirlles acceder a produtos e servizos avanzados a prezos competitivos e con prazos axustados ás súas necesidades
• O prazo de presentación de solicitudes iniciarase mañá, prolongándose durante un período de dous meses, e os apoios poden chegar ata o 80% do investimento subvencionable, estando previstos tamén anticipos de ata o 80%
• Coa primeira edición deste programa estanse a impulsar en Galicia seis centros de fabricación avanzada en sectores industriais diversos como as TIC, o biotecnolóxico, a loxística, o turismo ou o agroalimentario, cunha subvención total de máis de 16M€

Santiago de Compostela, 28 de setembro de 2023.- O Diario Oficial de Galicia publica hoxe unha nova convocatoria do programa de Centros de Fabricación Avanzada. Esta liña, que suma 10M€, ten por obxectivo promover a posta en marcha de proxectos de infraestruturas de uso aberto e compartido que teñan como finalidade o desenvolvemento da contorna das empresas, especialmente as pemes, e os consumidores, e a modernización e desenvolvemento da base industrial, a fin de mellorar a súa competitividade.

Esta dispoñibilidade local de infraestruturas de apoio á industria beneficia de modo particular ás pequenas e medianas empresas, posto que lles permite acceder a produtos e servizos avanzados a prezos competitivos e con prazos axustados ás súas necesidades. Ademais, ditas infraestruturas poñeranse a disposición dos usuarios interesados dunha forma aberta e transparente.

Así, mediante esta iniciativa a Xunta promove a presenza de infraestruturas axeitadas como un dos factores determinantes da modernización e a mellora competitiva das pemes galegas. De feito, estas infraestruturas abertas a pequenas e medianas empresas e autónomos supoñen unha oportunidade para contar con servizos aos que non poden ter acceso de xeito habitual.

Trala publicación hoxe no DOG, o prazo de presentación de solicitudes iniciarase mañá, prolongándose durante un período de dous meses. Os proxectos deberán facilitar o desenvolvemento da contorna das empresas e os consumidores así como a modernización da base industrial de Galicia, contando para acadar este obxectivo con apoios que poden chegar ata o 80% do investimento subvencionable, estando previstos tamén anticipos de ata o 80%.

Cómpre salientar que con anterioridade, e de cara a coñecer a demanda que teñen este tipo de espazos industriais compartidos, fíxose unha consulta entre o tecido produtivo galego na que se invitaba aos axentes económicos para que manifestasen o seu interese en acceder a unha liña de axudas para a posta en marcha de infraestruturas abertas de apoio á industria. Esta consulta permitiu coñecer a demanda de axudas, favorecendo a concertación de proxectos con tempo suficiente e facilitando o establecemento das bases de axuda cos interesados.

Así mesmo, a liña compleméntase cunha convocatoria dirixida a grandes empresas por importe de 5M€, que facilitará a capacidade financeira e de xestión solvente das infraestruturas, permitindo ao tecido empresarial apoiarse na capacidade tractora destas grandes empresas.

Seis centros de fabricación avanzada

A primeira edición deste programa impulsou a creación de seis centros de fabricación avanzada, que suman máis de 16M€ en apoios e que están a permitir promover proxectos en sectores industriais diversos, como as TIC, o biotecnolóxico, o turismo ou o agroalimentario.

En concreto, a Xunta achega 4,82 M€ para desenvolver un centro de servizos avanzados na Cidade das TIC da Coruña, que contará con catro laboratorios para a realización de probas e o aloxamento de empresas do sector.

O centro de fabricación avanzada do Tambre recibiu unha axuda de máis de 4 millóns de euros para prover ao sector biotecnolóxico de laboratorios para actividades de I+D+i, equipamento compartido e instalacións de uso común.

O terceiro proxecto é o Centro galego de tratamentos térmicos do aceiro, cun apoio de 2 millóns de euros. Situado en Narón, nace co obxectivo de facilitar a realización de máis traballos que teñan como base o aceiro, como poden ser os buques.

No eido do turismo e a innovación, impulsouse con 370.000 euros o Centro de Servizos Avanzados Galicia TurisTIC en Vilagarcía de Arousa. O centro nace para fomentar a creación de produtos, servizos e empresas de base tecnolóxica na cadea de valor da industria turística galega. A idea é conxugar innovación, emprendemento e formación a partir da dixitalización.

Finalmente, a Xunta apoiou a planta piloto de Inleit en Curtis con 2,4 millóns de euros para a síntese de proteínas e subprodutos lácteos de alta calidade e concedéronse 2,5 millóns de euros á Agrupación de Cooperativas Lácteas (Acolat), en Caldas de Reis, para impulsar un centro de fabricación avanzada de lácteos de alto valor engadido.