- O Igape resolve axudas para cinco empresas da provincia que incorporan medidas para axilizar procedementos de produción, almacenamento ou distribución
A Xunta de Galicia vén de resolver as axudas para a implantación de loxística avanzada e sustentable nas pemes galegas, que beneficiaron a cinco firmas lucenses con achegas que suman 97.900 euros para un investimento mobilizado de 244.000 euros.
O delegado territorial, Javier Arias, puxo en valor a aposta das empresas pola modernización de procesos e a transformación dixital como factores estratéxicos para gañar competitividade. Así, o obxectivo deste programa é facilitar a incorporación de solucións avanzadas para o transporte, almacenamento e posta á disposición de materias primas, compoñentes, semielaborados ou produtos finais, co fin reducir custos, prazos de entrega ou o impacto ambiental mellorando a calidade do servizo.
A empresa Hortícolas Javier Miranda, en Riotorto, obtivo apoios para automatizar o proceso de manipulación e envasado dos produtos cara á súa distribución en comercios ou establecementos de hostalería; deste xeito, axilízase o proceso para acurtar tanto o tempo de almacenamento como o prazo de entrega.
Tamén resultaron beneficiadas a empresa de pinturas Carlos Varela e Cegoagro, ambas en Begonte, para melloras no almacén e para a instalación de sensores de medición en silos, respectivamente. Completan a relación dúas empresas con sede na capital: Comenza recibiu apoios para deseñar fluxos loxísticos e Agroamb para implementar sensores en contedores de residuos no marco dun proxecto que se realiza en Santiago de Compostela.
Oficina virtual
