Rueda salienta o bo clima de diálogo social en Galicia que permite axilizar e activar inversións industriais

• O presidente da Xunta asistiu á clausura das xornadas A enerxía factor determinante na competitividade industrial, organizadas pola Fundación Anastasio de Gracia e a Federación de Industria, Construción e Agro de UGT.
• Agradece a colaboración de patronal e sindicatos na reclamación de financiamento europeo para proxectos estratéxicos para a comunidade e tamén na demanda do impulso de “infraestruturas xustas”, como o Corredor Atlántico do Noroeste.
• Defende a “enorme oportunidade” de apostar polo desenvolvemento das enerxías renovables porque considera que redundará nunha mellora da competitividade.

O presidente da Xunta, Alfonso Rueda, salientou o “bo clima” de diálogo social que existe en Galicia que permite axilizar e activar inversións de carácter industrial. Así o valorou durante a súa intervención na clausura da xornada A enerxía factor determinante na competitividade industrial, organizadas en Vigo pola Fundación Anastasio de Gracia e a Federación de Industria, Construción e Agro de UGT.

Rueda puxo en valor os 57 encontros nos que teñen participado Xunta, patronal e sindicatos nos últimos tres anos con carácter construtivo e das que se amosou satisfeito polo que supón de avance do diálogo social na comunidade. Neste senso, agradeceu a colaboración que recibiu o Goberno galego para reclamar a chegada de financiación europea a través dos Fondos Next Generation a proxectos estratéxicos, en referencia aos de Stellantis, Altri ou de Reganosa, Repsol e Naturgy, e tamén para a demanda do impulso de “infraestruturas xustas” para Galicia, como o Corredor Atlántico do Noroeste.

Custo enerxético e aposta polas renovables

Na súa intervención o presidente da Xunta tamén se referiu ao factor determinante do custo enerxético na competitividade industrial. Neste senso, apuntou á “enorme oportunidade” que ofrece Galicia en materia de enerxías renovables, en referencia á eólica mariña, da que defendeu o seu máximo aproveitamento. “É o momento”, aseverou, ao tempo que considerou que isto redundará na mellora da competitividade.